संगमनेरातील तरुणीवर लैंगिक अत्याचार, पाच जणांवर गुन्हा

Breaking News | Sangamner Rape Case: तरुणीला फसवून मुंबईतील मालाड येथे नेऊन तिच्यावर अत्याचार केल्याची धक्कादायक घटना उघडकीस आली.

संगमनेर: तालुक्यातील एका तरुणीला फसवून मुंबईतील मालाड येथे नेऊन तिच्यावर अत्याचार केल्याची धक्कादायक घटना उघडकीस आली आहे. या प्रकरणी संगमनेर पोलिसांनी पाच जणांविरुद्ध गुन्हा दाखल केला आहे, यामुळे परिसरात खळबळ उडाली आहे.

पोलिसांनी दिलेल्या माहितीनुसार, पीडित तरुणी कॉलेजमध्ये परीक्षेसाठी जात असल्याचे सांगून घरातून निघाली होती. पेपर दिल्यानंतर कॉलेजबाहेर असताना तिला एका अज्ञात मुलाचा फोन आला. त्याने तिला घुलेवाडी येथे एका महिलेच्या घरी येण्यास सांगितले. त्यानुसार ती तिथे गेली. त्यानंतर, तेथे उपस्थित असलेल्या दोन संशयित तरुणांनी तिला जबरदस्तीने थार गाडीमध्ये बसवून मालाड येथे नेले.

मालाडमधील एका हॉटेलमध्ये तिला चार ते पाच दिवस डांबून ठेवण्यात आले. या दरम्यान, मुख्य संशयित आरोपी तरुणाने तिला जबरदस्तीने दारू पाजली आणि त्याच्याजवळील धारदार हत्याराचा धाक दाखवून तिच्यासोबत अनेकवेळा शारीरिक संबंध प्रस्थापित केले.

पीडित तरुणीने घरी परतण्याची इच्छा व्यक्त केली असता, आरोपीने तिला मारहाण करण्यास सुरुवात केली. दरम्यान, या कृत्यात मदत करणाऱ्या एका महिलेने आरोपीला फोन करून सांगितले की, तरुणीच्या बेपत्ता होण्याची तक्रार दाखल झाली आहे, त्यामुळे त्यांना परत बोलावून घेतले.

त्यानंतर आरोपी तिला मुंबईहून संगमनेरकडे घेऊन आला आणि तेथून ते तळेगाव दिघे येथे आरोपीच्या घरी गेले. दुसऱ्या दिवशी, आरोपीच्या आईने पीडित मुलीला पोलीस ठाण्यात बोलावून “माझ्या मुलाच्या बाजूने बोल,” असे सांगितले. दबावाखाली येऊन मुलीने पोलिसांसमोर सांगितले की तिने आणि मुलाने स्वतःच्या मर्जीन लग्न केले आहे आणि यात कोणाचाही संबंध नाही. याबाबत पोलिसांकडून लेखी जबाबही घेण्यात आला.

तळेगाव दिघे येथे आरोपीच्या घरी गेल्यानंतर, पीडित तरुणीला आरोपी आणि त्याच्या कुटुंबीयांमध्ये वारंवार वाद होत असल्याचे जाणवले. तिने याबद्दल विचारणा केली असता, आरोपीने सांगितले की, “हे सर्व तुझ्यामुळे झाले आहे. माझे तुझ्यासोबत लग्न होण्यासाठी संबंधित महिलेला पैसे द्यायचे होते आणि ती आता तेच पैसे मागण्यासाठी येत आहे.” या संदर्भात तरुणीने त्या महिलेशी संपर्क साधला असता, महिलेने तिला मारहाण केली.

हे पाहून काही लोकांनी तरुणीच्या नातेवाईकांना बोलावले. त्यानंतर, पीडित तरुणीने घरी परतल्यावर घडलेला सर्व प्रकार आपल्या आईला सांगितला आणि पोलिसात धाव घेतली.

पीडित तरुणीच्या फिर्यादीवरून संगमनेर पोलिसांनी रोहित मधुकर दिघे (रा. तळेगाव दिघे), सौरभ अरुण शिंदे, सुरज अरुण शिंदे (रा. घुलेवाडी, ता. संगमनेर) आणि दोन अज्ञात महिला यांच्याविरुद्ध विविध कलमांन्वये गुन्हा दाखल केला आहे. पोलीस या प्रकरणाचा अधिक तपास करत आहेत.

Breaking News: Rape on youth in Sangamner, crime on five