अहमदनगर: चार दिवसांपूर्वी लग्न झालेल्या युवकाचा कालव्यात पडून मृत्यू
Breaking News | Ahmednagar: चार दिवसांपूर्वी लग्न झालेल्या युवकाचा जायकवाडी धरणाच्या उजव्या कालव्यात पडून मृत्यू झाल्याची घटना दुसऱ्या दिवशी आढळला मृतदेह.
बोधेगाव : शेवगाव तालुक्यातील हातगाव येथील चार दिवसांपूर्वी लग्न झालेल्या युवकाचा जायकवाडी धरणाच्या उजव्या कालव्यात पडून मृत्यू झाल्याची घटना समोर आली आहे. २८ एप्रिलला लग्न अन गुरुवारी (दि.२) सकाळी आठ वाजल्यापासून सदरील युवक बेपत्ता होता. शुक्रवारी (दि.३) दुपारी दोनच्या सुमारास संबंधित युवकाचा मृतदेह कालव्यात पाण्यावर तरंगत असल्याचे आढळून आले.
नागेश बंडू गलांडे (वय २५, रा. हातगाव, ता. शेवगाव) असे मृत युवकाचे नाव आहे. नागेश गलांडे याचा रविवारी (दि.२८ एप्रिल) विवाह झाला होता. गुरुवारी (दि.२) सत्यनारायण पूजेचा कार्यक्रम असताना नागेश सकाळी आठ वाजल्यापासून बेपत्ता होता. त्याचा फोनदेखील बंद असल्याने घरचे व ग्रामस्थांनी परिसरात शोध घेण्यास सुरुवात केली. सकाळी साडेनऊच्या सुमारास त्याची मोटारसायकल हातगाव-पिंगेवाडी गावाच्या दरम्यान जायकवाडी धरणाच्या उजव्या कालव्यालगत लावलेली आढळली. त्यामुळे नागेश कालव्यात तर पडला नसेल ना? या शंकेने गुरुवारी दिवसभर कालव्याच्या पाण्यात त्याचा शोध घेण्यात आला तसेच मित्र नातेवाईकांना फोन करून तुमच्याकडे आला आहे का?, अशी चौकशी देखील करण्यात आली. परंतु, नागेशचा कुठेही ठावठिकाणा लागत नसल्याने शेवगाव पोलिस ठाण्यात मिसिंगची तक्रार दाखल करण्यात आली. दुसऱ्या दिवशी शुक्रवारी (दि.३) शोधमोहीम सुरू असताना दुपारी दोनच्या सुमारास जायकवाडी धरणाच्या उजव्या कालव्यामध्ये चारी नंबर नऊच्या गेटजवळ नागेशचा मृतदेह पाण्यावर तरंगत असल्याचे आढळले.
घटनेची माहिती मिळताच बोधेगाव पोलिस चौकीचे सहाय्यक पोलिस उपनिरीक्षक नानासाहेब गर्जे यांनी घटनास्थळी भेट देऊन पाहणी केली. त्यानंतर मृतदेह कालव्यातून बाहेर काढून उत्तरीय तपासणीसाठी शेवगाव ग्रामीण रुग्णालयात पाठविण्यात आला. नागेश हा आई-वडिलांचा एकुलता एक मुलगा होता.
मयत युवकाच्या मिसिंगची तक्रार शेवगाव पोलिस ठाण्यात दाखल होती. शुक्रवारी दुपारी दोनच्या सुमारास त्याचा मृतदेह कालव्यात तरंगत असलेल्या अवस्थेत आढळून आला. याप्रकरणी शेवगाव पोलिस ठाण्यात अकस्मात मृत्यूची नोंद करण्यात आली आहे.
Web Title: Youth who got married four days ago fell into the canal and died
See also: Latest Marathi News, Breaking News live, Education Study
