संगमनेर: ट्रॅक्टर दरीत कोसळून शेतकर्‍याचा मृत्यू
Breaking News | Tractor Accident: दरीमध्ये ट्रॅक्टर कोसळून शेतकर्‍याचा दुर्दैवी मृत्यू.
संगमनेर: तालुक्यातील सावरगाव घुले गावांतर्गत असलेल्या बेलसोंडावाडी येथे मंगळवारी (दि.22) सकाळी 10 वाजता दरीमध्ये ट्रॅक्टर कोसळून तुकाराम गोविंद घुले या शेतकर्‍याचा दुर्दैवी मृत्यू (Death) झाल्याची घटना घडली आहे. तर त्याच्यासोबत असलेला सीताराम गणपत घुले हा शेतकरी गंभीररित्या जखमी झाला आहे.
याबाबत मिळालेली माहिती अशी, की बेलसोंडा फाट्यावरून बेलसोंडावाडीकडे ट्रॅक्टरद्वारे तुकाराम घुले हे पाणी घेऊन जात असताना ट्रॅक्टरचा टायर फुटून 200 फूट दरीत कोसळला. वस्तीवरील ग्रामस्थांना ट्रॅक्टर दरीत कोसळल्याचा आवाज आल्यानंतर डॉ. जवरे, तंटामुक्तीचे अध्यक्ष जालिंदर घुले, माजी सरपंच बाबाजी घुले, राजेंद्र घुले, राहुल घुले, उपसरपंच नामदेव घुले, ग्रामसेवक प्रमोद जाधव आदिंसह ग्रामस्थांनी घटनास्थळी तत्काळ धाव घेऊन मदतकार्य केले. त्यानंतर दोनशे फूट दरीतून झोळी करून ग्रामस्थांनी मृतदेह वर काढला. तर सीताराम घुले या शेतकर्‍याला उपचारार्थ संगमनेरातील खासगी रुग्णालयात दाखल करण्यात आले आहे.
या घटनेची माहिती मिळताच घारगावचे पोलीस निरीक्षक विलास पुजारी, पोलीस कॉन्स्टेबल प्रमोद गाडेकर यांनी बेलसोंडा वस्तीकडे धाव घेत घटनेचा पंचनामा केला आहे. दरम्यान, पठारभागातील रस्त्यांची मोठी दुरावस्था झालेली आहे. वाड्यांकडे जाणारे रस्ते खराब असल्याने परिसरातील नागरिकांना मोठा मनःस्ताप सहन करावा लागतो. अशातच पिण्याच्या पाण्यासाठीही वणवण करावी लागते. या घटनेने तालुक्यातून हळहळ व्यक्त होत आहे.
Breaking News: Farmer dies after tractor falls into ravine Accident
