Home क्राईम कुऱ्हाडीचे घाव घालून मोठ्या भावाचा खून; पोलिसांच्या भीतीने बापाची आत्महत्या

कुऱ्हाडीचे घाव घालून मोठ्या भावाचा खून; पोलिसांच्या भीतीने बापाची आत्महत्या

November 5, 2023

Crime News: दारू पिऊन घरच्यांना त्रास देण्यासह चोऱ्या करणाऱ्या सख्ख्या मोठ्या भावाचा लहान भावानेच शेतात झोपलेल्या जागी डोक्यात कुन्हाडीचे घाव घालून निर्घृण खून (Murder), पोलिसांच्या भीतीने त्या मुलांच्या वडिलांनी आत्महत्या केल्याची घटना.

शिरूर अनंतपाळ : दारू पिऊन घरच्यांना त्रास देण्यासह चोऱ्या करणाऱ्या सख्ख्या मोठ्या भावाचा लहान भावानेच शेतात झोपलेल्या जागी डोक्यात कुन्हाडीचे घाव घालून निर्घृण खून केल्याची घटना शिरूर अनंतपाळ तालुक्यातील सावरगाव शिवारात गुरूवारी (दि. २) रात्रीच्या सुमारास घडली.

ही घटना घडल्यानंतर पोलिसांच्या भीतीने त्या मुलांच्या वडिलांनी आत्महत्या केल्याची घटना शुक्रवारी (दि. ३) रोजी सकाळच्या सुमारास घडली. या प्रकरणी आरोपी भावाविरोधात शिरूर अनंतपाळ पोलीस ठाण्यात खूनाचा गुन्हा दाखल करण्यात आला आहे. आरोपीला पोलिसांनी अटक केली आहे. तर आत्महत्या केल्याची लातूर ग्रामीण पोलीस ठाण्यात नोंद करण्यात आली आहे.

लातूर तालुक्यातील मुशीराबाद येथील तानाजी संतराम काळे (रा. मुशीराबाद ता. जि. लातूर) असे आत्महत्या केलेल्या शेतकऱ्याचे नाव आहे. त्यांची शिरूर अनंतपाळ तालुक्यातील सावरगाव शिवारात शेती आहे. त्यांना दोन मुले आहेत. मोठा मुलगा शिवाजी तानाजी काळे हा अविवाहित आहे. तो सतत दारु पिऊन गावात व परिसरात लहानसहान चोऱ्या करीत होता. दिवसभर दारुच्या नशेत राहत होता. त्याच्या चोऱ्यांमुळे पोलीस व गावातील नागरिक घरी येऊन कुटुंबीयांना त्रास देत होते. गावातील नागरिक व पोलिसांच्या चौकशीला घरचे लोक त्रासून गेले होते. यामुळे लहान भाऊ बालाजी तानाजी काळे याने त्याचा मोठा भाऊ शिवाजी काळे याच्यामुळे होणाऱ्या त्रासाला कंटाळून बालाजी याने शेतात झोपलेल्या शिवाजी काळे याच्या डोक्यात कुन्हाडीचे घाव घालून त्याला जागीच ठार केले. ही घटना गुरूवारी (दि. २) रात्री ९.३० ते ११.३० च्या दरम्यान घटना घडली. यामुळे मयताची बहीण अहिल्या जितीन हुडे (वय २८ रा. बागझरी ता. अंबाजोगाई जि. बीड हा. मु. मुशीराबाद ता. जि. लातूर) यांच्या फिर्यादीवरून शिरुर अनंतपाळ पोलीस ठाण्यात गुन्हा रजि नंबर १९२ / २३ कलम ३०२ भादवी प्रमाणे आरोपी बालाजी तानाजी काळे (रा. मुशीराबाद ता. जि. लातूर) यांच्या विरुद्ध दि. ३ नोव्हेंबर रोजी उशीरा गुन्हा दाखल करून आरोपीला अटक करण्यात आली आहे. यावेळी पोलिसांच्या भीतीपोटी मयताचे वडील तानाजी संतराम काळे यांनी मुशीराबाद येथे गळफास घेऊन आत्महत्या केल्याची घटना घडल्याचे पोलिसांनी सांगितले. यावेळी खुनासाठी वापरण्यात आलेली कुऱ्हाड जप्त करण्यात आली आहे. आरोपीने मीच खून केल्याची कबुली दिल्याचे पोलिसांकडून सांगण्यात आले. पुढील तपास पोलीस निरीक्षक विठ्ठल दराडे यांच्या मार्गदर्शनाखाली पोलीस उपनिरीक्षक चंदनसिंह परिहार करीत आहेत. तानाजी संतराम काळे यांच्या मृत्यूची लातूर ग्रामीण पोलीस ठाण्यात आकस्म मृत्यूची नोंद करण्यात आली आहे.

Web Title: Elder brother Murder by ax wound Father commits suicide