अहमदनगर: ट्रॅक्टर उलटून १४ वर्षीय मुलाचा मृत्यू
Breaking News | Ahmednagar: ट्रॅक्टर घेऊन १४ वर्षीय मुलगा जनावरांना चारा आणण्यासाठी गेला असता चारीत ट्रॅक्टर उलटून अपघातात मृत्यू झाल्याची घटना.
श्रीगोंदा : जनावरांना चारा आणण्यासाठी गेलेल्या १४ वर्षीय शाळकरी मुलाचा ट्रॅक्टरवरील ताबा सुटल्याने रस्त्याच्या कडेला असलेल्या चारीत ट्रॅक्टर उलटून झालेल्या अपघातात डोक्याला गंभीर मार लागल्याने त्या मुलाचा मृत्यू झाल्याची घटना घडली आहे. शनिवारी (दि. ८) सायंकाळी सहाच्या सुमारास वडाळी (ता. श्रीगोंदा) येथे घडली.
सार्थक पांडुरंग वागस्कर (वय १४) असे अपघातात मृत झालेल्या मुलाचे नाव आहे. याबाबत अधिक माहिती अशी की, वडाळी येथील इयत्ता आठवीमध्ये शिकणारा सार्थक पांडुरंग वागस्कर हा मुलगा सायंकाळी सहाच्या सुमारास जनावरांना लागणारा हिरवा चारा आणण्यासाठी ट्रॅक्टर घेऊन गेला होता. गवत घेऊन येताना वडळी-श्रीगोंदा रस्त्यावरील तळ्याच्या भरावाखाली असलेल्या वळणाचा अंदाज न आल्याने त्याचा ट्रॅक्टरवरील ताबा सुटला. भरधाव ट्रॅक्टर रस्त्याच्या कडेला असलेल्या चारीमध्ये उलटला. या अपघातात मुलाच्या डोक्याला मार लागला. त्यात तो गंभीर जखमी झाला.
या घटनेची माहिती समजताच मुलाच्या नातेवाइकांनी त्याला उपचारासाठी श्रीगोंदा येथील खासगी रुग्णालयात नेले. तेथे प्राथमिक उपचार करत पुढील उपचारासाठी नगर येथील खासगी रुग्णालयात नेत असताना सार्थक याचा उपचारापूर्वीच मृत्यू झाला.
Web Title: 14-year-old boy dies after tractor overturns Accident
See also: Latest Marathi News, Breaking News live, Education Study
