आळंदीस निघालेल्या वारक-यांच्या ट्रॅक्टर ट्रॉलीस अपघात, एक वारकरी ठार तर ३० जखमी- Accident
Kolhapur | कोल्हापूर: कोल्हापूर येथून आळंदीस निघालेल्या वारकऱ्यांच्या ट्रॅक्टर ट्रॉलीस आज पहाटेच्या सुमारास भीषण अपघात (Accident) झाला. या अपघातात एक वारकरी ठार झाला असून ३० जण जखमी झाले आहेत. यामध्ये दोघांची प्रकृती गंभीर असल्याची प्राथमिक माहिती मिळाली आहे. या अपघातात मायाप्पा कोंडीबा माने (राहणार भादोले, ता. हातकणंगले, जि.कोल्हापूर) यांचा मृत्यू झाला आहे.
याबाबत पोलिसांकडून मिळालेल्या माहितीनूसार पुणे बंगळूर महामार्गावरील शिरवळनजीक हा अपघात पहाटे तीन वाजता झाला. वारकऱ्यांना घेऊन निघालेल्या दिंडीच्या ट्रॅक्टर ट्रॉलीस (एम.एच.१०.वाय. ५७०५) भरधाव आलेल्या भाजीच्या टेम्पोंने (एम.एच.४५. ए.एफ.२२७७) पाठीमागून धडक दिली. ही धडक इतकी भीषण होती, की वारकरी वाहनातून उडून रस्त्यावर पडले. त्यामुळे ते रस्त्यावरच विव्हळत होते. त्यांच्या हाता पायांना जखमा झाल्या आहेत. या अपघातात एकूण ३० वारकरी जखमी झाले आहेत. त्यापैकी दोघांची प्रकृती गंभीर आहे. या अपघातातील सर्व वारकरी हे भादुले, ता.हातकणंगले, जि. कोल्हापूर येथील रहिवासी आहेत.
Web Title: Warakari killed, 30 injured in tractor trolley accident
