पोलिसांची जुगारावर धाड; यावेळी एकाचा मृत्यू, पोलीस दलात खळबळ
Breaking News | Pune: पोलिसांना पाहून दुसऱ्या मजल्यावरून उड्या मारत ‘खेळणाऱ्यांनी’ पळ काढत असताना एकाचा गंभीर जखमी होऊन मृत्यू झाल्याची धक्कादायक घटना.
पुणे: जुगाराची माहिती मिळाल्यानंतर कारवाईसाठी गेलेल्या पोलिसांना पाहून दुसऱ्या मजल्यावरून उड्या मारत ‘खेळणाऱ्यांनी’ पळ काढत असताना एकाचा गंभीर जखमी होऊन मृत्यू झाल्याची धक्कादायक घटना घडली आहे. पुण्याच्या नाना पेठेत हा थरार रात्री घडला आहे. या घटनेने पोलीस दलात खळबळ उडाली आहे. ब्रायन रुडॉल्फ गिअर (वय ५४, रा. बाणेर) असे मृत्यू झालेल्याचे नाव आहे. याप्रकरणी समर्थ पोलीस ठाण्यात आकस्मात मृत्यूची नोंद करण्यात आली आहे.
शहरात पोलीस आयुक्तांच्या कडक आदेशानंतर देखील छुप्या पद्धतीने अन् स्थानिक पोलिसांच्या आशीर्वादाने अवैध धंदे सुरू असल्याचे गेल्या काही दिवसांपासून पाहायला मिळत आहे. दरम्यान, गुन्हे शाखेच्या पथकांना नाना पेठेतील क्राईस्ट चर्च समोर लाजवंती निवास या ठिकाणी पत्यांचा जुगार सुरू असल्याची माहिती मिळाली. त्यानूसार, युनिट एकचे वरिष्ठ अधिकारी तसेच त्यांचे पथक याठिकाणी कारवाईसाठी गेले होते. तेव्हा दार बंद होते. त्यामुळे पोलिसांनी नॉक केले, एकाने दरवाजा उघडला. मात्र दरवाजा उघडले नाही. त्याला पोलीस आल्याचे दिसताच त्याने दार लावून घेत पोलीस आले -आले असा आवाज दिला व एकच गोंधळ उडाला.
दरम्यान, फ्लॅट दुसऱ्या मजल्यावर होता. त्यामुळे चांगलीच तारांबळ उडाली होती. फ्लॅटमध्ये असलेल्या व्यक्तींनी थेट खाली उड्या मारत पळून जाण्याचे प्रयत्न सुरू केले. काहींनी इमारतीच्या पाईपवरून तर काहींनी उड्या मारल्या. त्यात ब्रायन यांनी उडी मारल्यानंतर त्यांना गंभीर मार लागला. त्यांचा एक पाय फॅक्चर झाला होता. त्यामुळे त्यांना एका नामांकित रुग्णालयात दाखल केले. परंतु, मध्यरात्री उपचार सुरू असताना त्यांचा मृत्यू झाला.
Web Title: Police raid on gambling One death this time
See also: Latest Marathi News, Breaking News live, Education Study
