मामाच्या घरात भाचीने डिझेल अंगावर ओतून स्वतःला पेटवून घेत आत्महत्या
Breaking News | Nashik Suicide: विद्यार्थिनीने मामाच्या राहत्या घरात स्टोव्हमधील डिझेल अंगावर ओतून स्वतःला पेटवून घेत आत्महत्या केल्याची घटना.
नाशिक: इयत्ता नववीतील पंधरा वर्षीय विद्यार्थिनीने मामाच्या राहत्या घरात स्टोव्हमधील डिझेल अंगावर ओतून स्वतःला पेटवून घेत आत्महत्या (Suicide) केल्याची घटना म्हसरूळ येथील वैदूवाडीत घडली. अनुष्का सुकलाल आठवले (मूळ रा. भुसावळ) असे मृत विद्यार्थिनीचे नाव आहे. तिच्या आत्महत्येचे कारण अस्पष्ट असून, म्हसरूळ पोलिस तपास करीत आहेत. अनुष्काच्या निधनामुळे परिसरात हळहळ व्यक्त होत आहे.
याबाबत मिळालेली माहिती अशी की, अनुष्का हिने रविवारी (दि. १०) सायंकाळी साडेसात वाजेच्या सुमारास तिचा मामा दीपेश भुकाने यांच्या घरात अंगावर डिझेल ओतून स्वतःला पेटवून घेतले. तिच्या मामासह इतरांना हा प्रकार समजताच त्यांनी आग विझविण्याचा प्रयत्न केला. जखमी अनुष्काला तातडीने जिल्हा शासकीय रुग्णालयात दाखल करण्यात आले. मात्र, अनुष्का शंभर टक्के भाजली असून, तिची प्रकृती गंभीर असल्याचे वैद्यकीय अधिकाऱ्यांनी स्पष्ट केले. उपचार सुरू असताना रात्री साडेअकरा वाजेच्या सुमारास अनुष्काचा मृत्यू झाला. घटनेची माहिती मिळताच म्हसरूळ पोलिस दाखल झाले. त्यांनी पंचनामा केल्यानंतर सोमवारी (दि. ११) सकाळी शवविच्छेदनानंतर अनुष्काचा मृतदेह नातलगांच्या ताब्यात देण्यात आला.
अनुष्का अभ्यासात हुशार होती. लहानपणापासून शिक्षणानिमित्त मामा भुकाने यांच्या घरी अनुष्का वास्तव्यास होती. तिचे आई-वडील भुसावळ येथे वास्तव्यास आहेत. तिच्या आत्महत्येचे कारण अस्पष्ट असून, नातलगांची चौकशी करण्यात येणार असल्याचे पोलिसांनी सांगितले. यासह तांत्रिक तपासाचेही आदेश वरिष्ठ अधिकाऱ्यांनी पथकाला दिले आहेत.
Web Title: Niece commits suicide by pouring diesel on her body and setting herself on fire
See also: Latest Marathi News, Breaking News live, Education Study
