संगमनेर: शेडमध्ये झोपलेल्या एकाचा हत्याराने डोक्यात वार करून खून

August 6, 2024

Breaking News | Sangamner: पत्र्याच्या शेडमध्ये झोपलेल्या वयोवृद्ध व्यक्तीच्या डोक्यात हत्याराने वार करून खून केल्याची घटना समोर आली आहे.

संगमनेर : घराजवळील पत्र्याच्या शेडमध्ये झोपलेल्या वयोवृद्ध व्यक्तीच्या डोक्यात हत्याराने वार करत त्यांचा खून करण्यात आला. ही घटना सोमवारी (दि. ५) सकाळी ६ वाजेच्या सुमारास उघडकीस आली आहे. संगमनेर तालुक्यातील झोळे येथे ही घटना घडली आहे. या प्रकरणी संगमनेर तालुका पोलिस ठाण्यात अज्ञाताविरुद्ध खुनाचा गुन्हा दाखल झाला आहे.

साहेबराव भीमाजी उनवणे (७७, रा. झोळे, ता. संगमनेर) असे खून झालेल्या वयोवृद्ध व्यक्तीचे नाव आहे. त्यांचा मुलगा दीपक उनवणे (४५) यांनी दिलेल्या फिर्यादीवरून पोलिसांनी अज्ञाताविरुद्ध खुनाचा गुन्हा नोंदवून घेतला. रविवारी मित्राचा वाढदिवस असल्याने संध्याकाळी ७.३० वाजेच्या सुमारास दीपक उनवणे हे रायतेवाडी येथे गेले होते. वाढदिवस झाल्यानंतर रात्री ११.३० वाजेच्या सुमारास ते घरी पोहोचले. त्यावेळी साहेबराव उनवणे हे घराजवळील पत्र्याच्या शेडमध्ये झोपलेले होते. दीपक आल्यानंतर ते उठले आणि त्यांना पाहून परत झोपले. सोमवारी सकाळी ६ वाजेच्या सुमारास दीपक यांच्या पत्नी श्रद्धा झोपेतून उठल्या, त्या ओरडत घरात आल्या आणि त्यांनी कुटुंबातील सदस्यांना उठविले. ‘डायल ११२’ क्रमांकावर माहिती दिल्यानंतर पोलिस घटनास्थळी आले. पोलिसांनी चौकशी केली. साहेबराव उनवणे यांना ग्रामीण रुग्णालयात नेण्यात आले. त्यांना मृत्यू झाल्याचे घोषित केले.

Web Title: man sleeping in a shed was killed by stabbing him in the head