अहमदनगर: अज्ञात व्यक्तीने केला शेतकऱ्याचा खून
Breaking News | Ahmednagar: एका शेतकऱ्याचा अज्ञात व्यक्तीने जबर मारहाण करत खून केल्याची घटना.
पाथर्डी: तालुक्यातील शिराळ येथील गडाख वस्तीजवळ एका शेतकऱ्याचा अज्ञात व्यक्तीने जबर मारहाण करत खून केल्याची घटना शुक्रवारी (दि.१४) उघडकीस आली. भुईमुगाच्या शेंगाचे राखण करण्यासाठी ते शेतातच थांबले होते.
लहानू गोपाळा पालवे (वय ५५, रा. सोकेवाडी, ता. नगर) असे खून झालेल्या शेतकऱ्याचे नाव आहे. सोकेवाडी येथील लहानू गोपाळा पालवे यांची शेती शिराळ (ता. पाथर्डी) येथील गडाख वस्ती जवळ आहे. गेल्या दहा-पंधरा दिवसांपासून ते त्यांच्या शेतातील भुईमुगाच्या शेंगाचे राखण करण्यासाठी या ठिकाणी राहत होते. गुरुवारी रात्री अज्ञात व्यक्तीने अज्ञात कारणाने त्यांना जबर मारहाण केल्याने त्यांचा जागीच मृत्यू झाला. या मारहाणीमध्ये पालवे यांच्या तोंडाला पाठीला व पायाला जबर मार लागल्याचे आढळून आले आहे. शुक्रवारी सकाळी आठ वाजता ही
घटना शिराळ येथील गडाख वस्तीच्या नागरिकांच्या लक्षात आली. त्यानंतर त्यांनी पोलिसांना याबाबत माहिती दिली. शिराळ येथे शेतकऱ्याचा खून झाल्याची माहिती समजताच अप्पर पोलिस अधीक्षक शिवपुंजे, पोलिस उपअधीक्षक सुनील पाटील, पाथर्डीचे पोलिस निरीक्षक संतोष मुटकुळे, लिमकर, उपनिरीक्षक विलास जाधव, जगदीश मुलगीर, पोलिस हवालदार विजय भिंगारदिवे, पोपट आव्हाड, विनोद मासाळक आदी घटनास्थळी दाखल झाले. पालवे यांचा मृतदेह पाथर्डी व त्यानंतर नगरला शवविच्छेदनासाठी पाठविण्यात आला. शेतकऱ्याचा खून झाल्याची घटना समजताच शिराळ, चिचोंडी, कोल्हार, सोकेवाडी, आव्हाडवाडी परिसरातील नागरिक मोठ्या संख्येने घटनास्थळी दाखल झाले होते.
Web Title: farmer was killed by an unknown person
See also: Latest Marathi News, Breaking News live, Education Study
