Theft: धूमस्टाईलने पळविले महिलेच्या गळ्यातील गंठण
Parner Theft News: भरदिवसा चोरीची घटना घडल्याने परिसरात खळबळ.
पारनेर: दुचाकीवरून आलेल्या दोघांनी महिलेच्या गळ्यातील गंठण लांबविल्याची घटना तालुक्यातील नगर कल्याण महामार्गावरील टाकळी ढोकेश्वर येथे वासुंदे चौकात घडली. भरदिवसा चोरीची घटना घडल्याने परिसरात खळबळ उडाली आहे. चार दिवसांपूर्वी पॉलिश करण्याच्या बहाण्याने टाकळी ढोकेश्वर येथून महिलेचे दागिने लांबविले होते. त्यानंतर ही घटना घडल्याने परिसरातील महिलांमध्ये भितीचे वातावरण आहे.
पळसपूर येथील नीलम दत्ताञ्य आहेर ह्या त्यांच्या गावाकडे जात असताना टाकळी ढोकेश्वर येथील वासुंदे चौकात काही वस्तू खरेदी केल्या. त्यानंतर त्या चौकात उभ्या असताना टाकळी ढोकेश्वरकडून पल्सर दुचाकीवरून चोरटे आले. त्यांनी निलम यांच्या गळ्यातील गंठण बळजबरीने हिसकावून नेले. आरोपी पारनेरच्या दिशेने गेल्याची माहिती मिळाली आहे.
घटनेची माहिती मिळताच पारनेर पोलिस स्टेशनच्या टाकळी ढोकेश्वर दूरक्षेत्राचे पोलिस कर्मचारी घटनास्थळी दाखल झाले. पोलिसांनी आजूबाजूच्या दुकानांमधील सीसीटीव्ही फुटेजची पाहणी केली असून त्यानुसार तपास सुरू आहे.
Web Title: Dhoomstyle theft the knot from the woman’s neck
