Home अहमदनगर बॉलिवूडचा बादशहा सुपरस्टार शाहरुख खान साईचरणी नतमस्तक

बॉलिवूडचा बादशहा सुपरस्टार शाहरुख खान साईचरणी नतमस्तक

December 15, 2023

Shirdi News: सबका मालिक एक हा मूलमंत्र देणाऱ्या श्री साईबाबांच्या दर्शनासाठी बॉलीवुडचा सुप्रसिद्ध अभिनेता सुपरस्टार शाहरूख खान (Shah Rukh Khan ) परिवारासह साईचरणी नतमस्तक.

शिर्डी : सबका मालिक एक हा मूलमंत्र देणाऱ्या श्री साईबाबांच्या दर्शनासाठी बॉलीवुडचा सुप्रसिद्ध अभिनेता सुपरस्टार शाहरूख खान गुरुवारी परिवारासह साईचरणी नतमस्तक झाला. शाहरुख खान याने गुरुवार दि. १४ डिसेंबर रोजी साईदरबारी हजेरी लावत श्री साई समाधीचे मनोभावे दर्शन घेतले. यावेळी साईबाबा संस्थानचे मुख्य कार्यकारी अधिकारी पी. शिवा शंकर यांनी साईबाबांची मूर्ती, शाल तसेच साईसच्चरीत देऊन शाहरूख खानचा सत्कार केला. याप्रसंगी प्रशासकीय अधिकारी राजतीलक बागवे, प्रशासकीय अधिकारी प्रज्ञा महांडुळे, मंदिर विभागप्रमुख रमेश चौधरी, संरक्षण अधिकारी अण्णासाहेब परदेशी, जनसंपर्क अधिकारी तुषार शेळके, शाहरुख खानची मुलगी सुहाना खान यांच्यासह डंकी चित्रपटातील कलाकार उपस्थित होते. श्रद्धा आणि सबुरीचा संदेश देणाऱ्या श्री साईबाबांच्या दर्शनाला जगभरातून करोडो साईभक्त येत असतात. त्यामध्ये राष्ट्रपती, पंतप्रधान, राजकीय नेते, बॉलीवुड अभिनेते, अभिनेत्री आदी मंडळींचा समावेश असतो; मात्र बॉलिवूडचा बादशाह म्हणून ओळखला जाणारा तसेच लाखो तरुण- तरुणींच्या गळ्यातील ताईत बनलेला अभिनेता शाहरुख खान शिर्डीत आल्याची

खबर पसरताच आपल्या लाडक्या अभिनेत्याला पाहण्यासाठी चाहत्यांनी मंदिर परिसरात तुडुंब गर्दी केली होती. किंग खानची एक झलक पाहण्यासाठी उभ्या असलेल्या चाहत्यांना शाहरुखनेदेखील हात उंचावून अभिवादन केले. यावेळी मोठा पोलिस बंदोबस्त तैनात करण्यात आला होता.

Web Title: Bollywood superstar Shah Rukh Khan bows down to Saicharani