अहिल्यानगर: चारित्र्याच्या संशयावरून पत्नीचा निर्घुण खून
Breaking News | Ahilyanagar Murder: चारित्र्यावर संशय घेत पतीने पत्नीचा निर्घुण खून केल्याची खळबळजनक घटना उघडकीस आली.
पाथर्डी: तालुक्यातील एकनाथवाडी येथे शुक्रवारी (दि.९) पहाटे चारित्र्यावर संशय घेत पतीने पत्नीचा निर्घुण खून केल्याची खळबळजनक घटना उघडकीस आली आहे. राणी सतीश खेडकर (वय २९) असे खून झालेल्या पत्नीचे नाव असून, तिचा पती सतीश भास्कर खेडकर (वय ३३) याला पाथर्डी पोलिसांनी ताब्यात घेतले आहे.
पोलिसांनी दिलेली माहिती अशी, आरोपी पती सतीश खेडकर याने घरगुती वादातून रागाच्या भरात पत्नीच्या पाठीत आणि गळ्यावर कात्रीने वार करत तिचा जीव घेतला. ही घटना शुक्रवारी पहाटेच्या सुमारास राहत्या घरी घडली.
खून केल्यानंतर आरोपी सतीश खेडकर स्वतःहून पाथर्डी पोलीस ठाण्यात हजर झाला आणि त्याने पोलिसांसमोर हत्या केल्याची कबुली दिली. त्यानंतर पोलिसांनी त्याला ताब्यात घेतले. खेडकर याला पाच वर्षाचा एक व सात वर्षाचा एक अशी दोन मुले आहेत.
घटनेची माहिती मिळताच पाथर्डी पोलीस ठाण्याचे पोलीस निरीक्षक संतोष मुटकुळे, सहाय्यक पोलीस निरीक्षक हरीश भोये, शिवाजी तांबे व पोलीस उपनिरीक्षक विलास जाधव यांनी घटनास्थळी धाव घेतली. पोलिसांनी मृतदेह शवविच्छेदनासाठी शासकीय रुग्णालयात पाठवला असून पुढील तपास सुरू आहे. मृत मुलीचे वडील सुखदेव आप्पाजी ढाकणे (रा. हसनापूर ता. शेवगाव) यांच्या फिर्यादीवरुन पाथर्डी पोलीस ठाण्यात सतीश खेडकर याच्याविरोधात गुन्हा दाखल करण्यात आला आहे. दरम्यान, दोन दिवसांत तालुक्यात महिलांच्या खुनाच्या दोन घटना समोर आल्याने परिसरात मोठी खळबळ उडाली आहे.
Breaking News: Wife’s murder due to suspicion of character
