संगमनेर: बिबट्याच्या हल्ल्यात महिलेचा मृत्यू, मका कापणीस गेल्या अन….
Breaking News | Sangamner: बिबट्याच्या हल्ल्यात महिलेचा मृत्यू.
संगमनेर : संगमनेर तालुक्यात पुन्हा एकदा बिबट्याने हल्ला केल्याने एका महिलेला आपला जीव गमवावा लागला आहे. या धक्कादायक घटनेने संताप व्यक्त होत आहे. संगमनेर तालुक्यातील देवगाव येथे बिबट्याच्या हल्ल्यात महिलेचा मृत्यू झाला. ही घटना शुक्रवारी (दि.११) संध्याकाळी सहा वाजेच्या सुमारास घडली. योगिता आकाश पानसरे (वय ३८, रा. देवगाव) असे मयत महिलेचे नाव आहे. त्यांना उपचारासाठी शहरातील एका खासगी रुग्णालयात दाखल करण्यात आले होते; मात्र त्यापूर्वीच त्यांचा मृत्यू झाला होता.
याबाबत माहिती अशी की, देवगाव येथील रहिवासी आकाश पानसरे हे दूध उत्पादक शेतकरी आहेत. त्यांच्या कुटुंबात पत्नी योगिता, तीन मुले आणि इतरही सदस्य आहेत. योगिता पानसरे या पानोबा वस्तीवर मका कापणीस गेल्या होत्या. दबा धरून बसलेल्या बिबट्याने संध्याकाळी सहा वाजेच्या सुमारास त्यांच्यावर हल्ला केला. हा प्रकार शेतातील काही महिलांच्या लक्षात आल्याने त्यांनी आरडाओरड केली. योगिता पानसरे यांना बिबट्याने काही अंतर ओढत नेले. आरडाओरड झाल्याने बिबट्या तेथून पळून गेला. त्यानंतर जखमी पानसरे यांना शहरातील एका खासगी रुग्णालयात उपचारार्थ दाखल करण्यात आले; मात्र त्यापूर्वीच त्यांचा मृत्यू झाला होता.
Web Title: Woman dies in leopard attack
See also: Latest Marathi News, Breaking News live, Education Study
